Námskeið í björgunartækni hjá ICET.

Þetta er í þriðja skipti sem Ólafur Gíslason & Co hf stendur straum af kostnaði við að senda menn á námskeið hjá ICET og erum stoltir af því að geta komið að menntunarmálum greinarinnar með þessum hætti. Við sóttum reyndar um styrk úr Námssjóði brunamála, en því miður sá sjóðsstjórnin sér ekki fært að styrkja þetta framtak okkar, þó svo að í okkar huga sé þetta þekking sem nýtist öllum sem að björgunamálum koma. Nú þegar er einn Íslendingur með kennararéttindi, en það er Friðrik Þorsteinsson. Þessi menntun hans nýtist honum vel hjá SHS sem og hjá Brunamálastofnun, þar sem hann hefur verið einn aðalkennarinn á björgunartæki sem er vel því stofnunin hefur ekki sýnt áhuga á að mennta menn í þessum fræðum. Við hjá Ólafi Gíslasyni & co hf njótum einnig góðs af þessari þekkingu því við, einir seljenda björgunartækja bjóðum 1 dags námskeið endurgjaldslaust með öllum tækjasettum sem við seljum. Hægt er að fræðast nánar um starfsemi ICET með því að smella á þessa slóð www.icet.nl  

Á fyrri part námskeiðsins var kennd aðkoma og fyrstu viðbrögð á slysstað, meðhöndlun slasaðra, val á björgunar/sjúkrabúnaði og fleiri atriði sem nauðsynlegt er að hafa í huga við björgun slasaðra. Ekki má sleppa því að nefna að farið var sérstaklega í björgun fólks úr stærri bifreiðum, (vörubílum og hópferðabílum) og er það vel, því umferð slíkra bifreiða er alltaf að aukast. Helmingur tímans var notaður í verklega þjálfun og helmingur í fræðilega þáttinn. 

Seinni hluti námskeiðsins var í verkefnaformi og í beinu framhaldi af efni fyrri hlutans. Nemendurnir settu á svið slys með hliðsjón af aðstæðum í heimabyggð, og komu með úrlausnir, svo sem aðkomu, fyrstu aðgerðir, völdu tækjabúnað og verklag við að bjarga hinum slösuðu.

Það er á þeim fimmmenningum að heyra að þeir eru mjög ánægðir með námskeiðin, Þeir segjast hafa lært mikið og að þeir geti tvímælalaust nýtt sér þessa auknu þekkingu bæði við störf á slysstað og eins við þjálfun annarra. Það kom einnig fram hjá þeim að þeir vilja helst af öllu drífa sig á framhaldsnámskeið hjá ICET og fara þá á kennaranámskeið. Eftir það námskeið er hægt að fá viðurkennd alþjóðleg kennararéttindi í björgunarfræðum.

Túrinn var notaður í fleira en námskeið, því þeir félagar notuðu tækifærið og fóru í heimsókn til höfuðstöðva ICET og leist vel á. Til upplýsinga þá er ICET viðurkennd fræðslu og þjálfunarstofnun fyrir björgunarfólk, leiðbeinendur, og kennara í björgunarfræðum. Þar er hægt að komast á margskonar námskeið og læra allt um björgun, hvort sem er fjallabjörgun, flugslysabjörgun, bílslysabjörgun og fl.  

Einnig var farið í heimsókn til Holmatro og verksmiðjan skoðuð. Þar fengu menn að skoða mjög tæknivædda verksmiðju og fylgjast með gæðaeftirliti þeirra. En það má nefna að hvert einasta tæki er prófað áður en það fer út úr húsi. Holmatro björgunartækin þarf varla að kynna fyrir mönnum hérlendis því eins og flestir sem að björgunarmálum koma vita, þá eru Holmatro björgunartæki lang algengustu björgunartæki á Íslandi og í notkun hjá slökkviliðum og björgunarsveitum um allt land. Fræðist nánar um Holmatro á þessari slóð www.holmatro.com

Það er umhugsunarvert að þó að Holmatro björgunartæki séu lang algengustu tækin hér á landi, hafi reynst vel og að notendur séu ánægðir með tækin, hefur Brunamálastofnun, sem sér að mestu um kennslu og þjálfun manna í notkun slíkra tækja ekki sýnt neinn áhuga á að verða sér úti um Holmatro tæki. Í mínum huga hlýtur að vera skynsamlegra að kenna notendum á búnað sem er nú þegar í notkun og líklegt að þeir menn sem sækja námskeið hjá stofnuninni muni nota í framtíðinni. Fyrir ekki svo löngu síðan keypti stofnunin björgunartæki af ákveðinni gerðog þótti ekki ástæða til að leita til annarra um samanburð á verði, gæðum eða útbreiðslu hérlendis.

 Benjamín Vilhelmsson